Ohunjon Madaliyev - Ketgim kelmayapti, onajon

Shamollar uyg‘ondi - barg hayajonda
Hatto yer ostida qo‘zg‘aldi ilon
Dunyo ko‘zlarini ochayotganda
Ketgim kelmayapti onajon
O‘ngirlarda kezar muzdek havolar
Ishqalab qobog‘in ko‘tarar osmon
Mana shu bog‘larni ko‘rmasdan turib
Ketgim kelmayapti onajon

Qizlarning ovozi kelyapti munis
Ishq desam - daftarga sachrab ketdi qon
Suymasa suymapti bir chiroyli qiz
Dunyoda qiz kammi onajon
Begunoh bittadir u ham osmonda
Qo‘lga chivin qo‘ndi - quvmoqqa yo‘q jon
Chivinlar chumchuqlar yurgan jahonda
Menga joy yo‘qmidi onajon?

Garchand mungli qo‘shiqlar aytdim
Garchand azob ko‘rdim mudom bepoyon
Men hali dunyodan to‘ygan yo‘q edim
Dunyo to‘ydimikan mendan onajon?